De Patronaatsknöppele

Pierre Lemmens, Peter Broersma, Jan Thomassen en Jos Hanssen ginge in 1995 nao aafloup van de galazitting van De Sajelaire in Aelse nog ’n eike bakke en ’n pilske pakke biej de sjus oetgeroope Prins Frank I. Ongerwaeg woort sjpontaan ein leedje gemaak mit de teks “Veer riete dae Frank eine biej”. En toen ze biej ‘t hoes van Frank aankaome zônge waal 30 luuj mit hun mit.

Hiedoor waor ‘t idee gebaore ein vastelaovesleedje te make. Eine tekst hauwe ze, ein melodie hauwe ze auch, eine zènger hauwe ze en auch ein achtergrôndjkwar. ‘T einigste wat ze nog neet hauwe waor eine naam. Jos woort al jaore door ziene chef op zien werk Patronaatsknöppel of zaotbökkem geneumd es hae weer ins ein sjtômmigheid hauw oetgehaold. En omdat de veer jônges zich door sjtômmigheid gevônje hauwe, woort besjlaote de naam Patronaatsknöppele te gebruuke. Op de 11e van de 11e 1995 vông ’t jetste optraeje plaats, dat doerde waal mèr effekes, want ze hauwe mèr éin leedje “Veer Riete ‘m ‘ne Biej”.

Al gauw kaome zie tot de konklusie dat 1 nummer toch wel get mager waor ôm internasjionaal door te braeke. Dus woorte same mit komponis Jürgen Daemen mjè nummerkes gesjreeve. Mit es gevolg dat in 1999 hun jetste CD “Lache is Gezôndj” oetkaom.

De CD die in ein oplage van 500 sjtöks mit geljènd geld wòrt gemaak, waor nao 3 waeke volledig oetverkoch.De fenklup waor inmiddels oetgegreujd tot 100 leeje en ze woorte auch sjteeds dèkker veur optraejes boete Aelse gevraog.

In 2001 höbbe de Knöppele hun 2e CD “Laot d’n Tap Mer Laupe” biej studio Pebble Music in Mestreech opgenôme. Allemaol eige nummersj op meziek van Jürgen Daemen.
Op aandringen van arrangeur Freddy Mays woorte in 2002 ein twjètal nummers ingezônde nao ‘t Limburgs Vastelaovesleedjes Konkoer (LVK). Oeteindelik drông ’t nummer “Auwt” door tot de finale op 24 jannewari 2002 in Grubbenvorst en belandj op ’n gedeilde 11e plaats!

In december 2002 brènge de Knöppele ’n maxisingel oet mit ôngerangere “Hoebair” dat taege alle verwachtige in,  helaas neet door de veurrunjes van ‘t LVK 2003 heen kump. “Hoebair” is noe, jaore later nog altied ’n griesgedrèjd nummer.

Eind 2003 brènge de Knöppele ’n maxi-singel oet mit als klapper “Jodelodelohiti”. Dat nummer kènt eederein van Gennep tot Eysden ôngertössje mitbrulle! In 2004 geit ’t weer ’n sjtök baeter in ’t LVK en de Knöppele dringe door tot in de hauf finale mit ’t autobiografies nummer “Ich Höb Mich Versjlaope”.

In ’t naojaor van 2004 brènge zie hun 5 e CD “Alles Kump Weer Good” oet. ’t Gelieknamige titelnummer haolde de finale van ’t LVK neet, mer hauw dao zeker neet missjtange! Mer ’t LVK is neet hun belangriekste bezigheid.

De Patronaatsknöppele zin door de N.U.L (Narren Universiteit Limburg) gepromoveerd tot Doctorandus van de N.U.L. Pierre Cnoops verzörgde in Fort St. Pieter in Mestreech de oetreiking van deze biezônjere titel. En dao zin ziej bès grwetsj op.

Sinds jannewari 2003 sjtônge ziej zwan 200 kjèr op de buun in Limburg, Brabant en op ’t Belsj. De optraejes veur 2006 sjtruime bènne. Ze kriege sjeif gezichte ômdat ze nog gein optraejes veur 2007 wille booke!

Mer ’t kontak met hun fens is en blief altied hjèl belangriek. Dat bliek auch oet ’t grwat aantal aanmeldinge veur hunne nuutsbreef op de websaaijt www.patronaatsknoppele.nl.

De optraejes van de Patronaatsknöppele zin ‘nne miks van korte sketsjes en leedjes. Veurdat ’n leedje ingezat wurt, verkoupe ze jets get sjtôme kal of vertèlle annekdotes die höbbe geleid tot de leedjes.

Peter mit ziene mimiek en zien elastiek lichaam en hun sumpel aankleijing zörge veur de res! Hjelväöl luuj dènke ech dat Peter neet richtig tik en höbbe mitlieje mit häöm! Veer maoge hiej verklappe dat zien vrouw en kènjer hjel bliej mit ‘m zin en de Knöppele auch!

Bezeuk hun optraejes en geer gaot veur de biel!